Engevik Byggsenter vann Næringsprisen 2025

31.10.2025 | Tekst: Torbjørn Brosvik

Stian Engevik var stolt og glad då han takka for Næringprisen 2025. Juryen har lagt vekt på at Engevik Byggservice heilt frå starten har drive solid og godt, bygd stein på stein og no har passert 100 millionar i omsetnad.

Årsfesten til Stord Næringsråd fann stad på Stord hotell siste dagen i oktober. Medan born og unge hadde kledd seg ut med skumle klede og spurte om knask eller knep, var næringslivet samla i finstasen til ein betre middag. På menyen stod både laks og hjort, og hotellet hadde gjort sitt ytterste for å tilberede maten til perfeksjon.

Nils Eivind Horneland stod for underhaldninga på festen og fekk salen med i trampeklapp då han hadde laga songvers om dei tre finalistane til Næringsprisen, Aritech, Engevik Byggservice og Urt & Ugras.

Stian Engevik fortalde om historia til Engevik Byggsenter då han heldt takketalen som vinnar av Næringsprisen 2025.

Frå juryen si grunngjeving for prisen heiter det mellom anna at Engevik Byggsenter og Engevik-konsernet er ei verksemd som gjennom mange år har drive solid og godt, og i 2024 passerte omsetnaden 100 millionar berre i byggsenteret. Vidare peikar juryen på at dei starta nærast med to tomme hender og eit lass med grus, før dei har bygd stein på stein opp til det verksemda har blitt i dag. Juryen har også lagt vekt på at verksemda engasjerer seg i lokalmiljøet ved å sponsa lokale idrettslag og bidra til fellesskap og aktivitet for born og unge.

Sjølve beviset på Næringsprisen er verket "Visjon" av Alf Christian Hvaring.

Informasjon

Engevik Byggsenter vann Næringsprisen 2025

LES FLEIRE NYHENDE

Ny medlem - Signatur Management

Newtonrommet på Nysæter er opna