Liv Kari Eskeland nominert til ny styreleiar i Stord Næringsråd
Liv Kari Eskeland har omfattande erfaring frå politikk og næringsliv. Ho har vore leiar i LINK Arkitektur og hatt ulike roller i olje- og gassnæringa. Ho har òg har hatt ei rekkje styreverv, mellom anna i KLP, Vinmonopolet og Bremnes Fryseri. Som politikar har Eskeland bak seg to periodar som ordførar og to periodar på Stortinget, der ho no er 1. vara. Ho er kjend for si evne til raskt å setja seg inn i komplekse saker, kombinert med godt overblikk og eit sterkt engasjement for lokalsamfunn, industriutvikling, samferdsle og gode rammevilkår for næringslivet.
Ho tek over etter Odd Naustdal som har vore styreleiar dei to siste åra.
– Styret har saman med dagleg leiar Torbjørn Brosvik laga ein oppdatert strategiplan som har som formål å styrka SNR som møteplass, pådrivar og talerøyr for næringslivet på Stord. I tillegg til sentrale område som samferdsle, kompetanse og rammevilkår, må me framover styrka samhandlinga i regionen, trappa opp påverknadsarbeidet og sørgje for at næringslivet vert tydelegare posisjonert nasjonalt. Med Liv Kari som arbeidande styreleiar og Torbjørn Brosvik som dagleg leiar har me eit sterkt og handlekraftig lag som har gode føresetnader for å lukkast med dette, seier avtroppande styreleiar Odd Naustdal.
– Me har eit imponerande næringsliv i Sunnhordland som fortener meir merksemd, også utafor regionen. Eg gler meg til å bidra til å løfte fram den unike posisjonen me har ved å vera lokalisert mellom Bergen og Stavanger. Eg trur det ligg i eit potensiale i å styrke samhandlinga mellom kommune, fylke og relevante næringsaktørar i Sunnhordland, og at me kan få til meir i fellesskap enn det kvar enkelt av oss greier på eiga hand. Eg ser fram til å setje viktige saker på dagsorden og arbeida for tettare næringspolitisk samarbeid i regionen. Det trur eg vil vera ein styrke for næringslivet både på Stord og i resten av Sunnhordland, seier Eskeland.
Som eit ledd i å styrke samhandlinga med relevante aktørar, har styret også vedtatt ein intensjon om å flytte SNR sitt kontor frå Kunnskapshuset til Verket på Vabakkjen, kor Atheno, Sunnhordlandsrådet, Invest in Sunnhordland og Stord Kommunale Utviklingsselskap er lokalisert. Dette vil bli effektuert så snart som praktisk mogleg.
Årsmøtet er 23. mars - Årsmøte for Stord Næringsråd - frukostmøte
Valnemnda si innstilling:
Styreleiar:
Liv Kari Eskeland, Paladio
Styret:
Odd Naustdal, Aker Solutions (attval)
Janne Ertresvåg, Leirvik (ny)
Randi Beate Hovland, Stord Kommunale Utviklingsselskap (ikkje på val)
Elisabeth Nonås Fylkesnes, Bypass (ikkje på val)
Sigurd Sandvold, HVL (ikkje på val)
Reinert Horneland, XL Bygg Valvatne (ikkje på val)
Vara:
Christian Myklebust, DNB (attval)
Are Holsvik, Sparebanken Norge (ny)
Valnemnd:
Øystein Kvalvik (attval)
Einar Almås (attval)
Oddvar Hårde (ny)
I tillegg er Stord kommune v/kommunalsjef Lovise Vestbøstad observatør i styret.
SNR takkar avtroppande styre- og varamedlemer Oddvar Hårde, Nina Lovise Langeland og Tor Gjøsæter for innsatsen.
Informasjon
