Vil ha betre samarbeid i anleggs- og VA-marknaden
Det var brei semje om at betre samarbeid tidleg i prosessane er avgjerande for å lukkast. Deltakarane peika særleg på behovet for tydelegare konkurransegrunnlag, meir realistiske krav og betre oversikt over komande prosjekt.
Behov for meir føreseielegheit
Fleire peika på at marknaden i dag er prega av svingande aktivitetsnivå, aukande kostnader og usikkerheit knytt til framtidige oppdrag. Dette gjer det vanskeleg for entreprenørane å planleggje kapasitet og ressursbruk.Eit sentralt innspel var at byggherrar og entreprenørar må kome tidlegare i dialog. Det kan gi betre planlagde prosjekt, meir balansert risikofordeling og meir treffsikre konkurransegrunnlag.
Det vart også løfta fram at uavklarte postar og ulike tolkingar av kontraktar kan føre til ulik prising og mindre føreseieleg konkurranse.
Meir praktiske miljøkrav
Miljøkrav og massehandtering var også tema i møtet. Her etterlyste deltakarane meir praktiske og målretta løysingar.Det vart understreka at miljøkrava må gi reell klimaeffekt, utan å føre til unødvendig kostnadsvekst eller svekkje konkurransegrunnlaget for lokale aktørar.
– Skal vi få mest mogleg ut av offentlege investeringar, må vi ha krav og kontraktar som gir rom for både konkurranse, lokal kapasitet og god ressursbruk, seier dagleg leiar i Stord Næringsråd, Torbjørn Brosvik.
Viktig dialog
Også bransjen sjølv peikar på verdien av tettare dialog.– Bedriftene ønskjer å levere gode prosjekt, men dei treng rammer som er føreseielege og mogleg å planleggje etter. Slike møte er viktige for å få fram kva som fungerer i praksis, seier Mona Løvås i Maskinentreprenørenes forbund, region Vest.
Tek innspela vidare
Stord Næringsråd vil no følgje opp innspela frå møtet i dialog med offentlege aktørar og politiske miljø.Målet er å bidra til betre samhandling og meir treffsikre rammevilkår, slik at viktige infrastrukturprosjekt kan gjennomførast på ein effektiv og berekraftig måte.
Informasjon
